對上一次去Oyster C 已經係兩三個月前的事...女友同我都念念不忘金毛強的一舉一動同誠意推介!因此係呢個炎熱天氣下,不怕搞腸沙的危險決定再次決戰金毛強!!

其實金毛強係Oyster C 的疑似老闆!因為佢的外型比起同場其他員工確實特出,加上佢的風趣及誠意推介,我諗去過Oyster C的客人對佢都一定有印象..

去到第一時間當然係揀蠔啦,我同女友都覺得佢呢度D蠔的種類同選擇係比一般蠔吧多!

係d蠔未到之前,影吓個環境比大家睇..其實佢大部分的牆都比佢d客畫到花曬.問金毛強有冇筆比我地撩隻龜,佢竟然話d筆冇墨...激死

第一round蠔嚟啦!!由右上角起順時針佢地係Scotland的Younder Field,Australia的Coffin Bay同New Zealand 的唔記得名..三隻中我自己最喜歡Coffin Bay!海水味同口感都十分好!

同枱奉送調味料一碟!不過各位留意,當金毛強見你係咁落sauce之後會走過你身邊同你講 "下一隻試下唔好落汁..完汁完味仲好食!"亦因為咁我地個晚完全冇掂過呢碟sauce. 金毛強見狀,過來收碟調味料的時候,我地已經好快開口話"係你教食蠔唔使落sauce..因為咁會嘥咗隻蠔!你仲話其他地方我唔咁保證..不過係我呢度食一定唔使落!!"
佢聽完之後一邊落碟sauce一邊陰陰咀偷笑

食蠔點可以冇白酒..自己係百住買咗支Babich(HK$95)!溫馨提示:呢度唔收開瓶費!!

第二round再嚟啦!!由右上角起順時針佢地係South Africa 的 Jumbo, Australia的 Angus Belon同 法國的Fine De Claire..呢一round最正的係 Angus Belon! South Africa Jumbo實在太 heavy..根本冇可能一口食落肚!!

大家唔好誤會點解會post張蠔殼相!呢個係金毛強教落,反轉個d你喜歡的蠔係隻碟.當waiter/waitress問你仲想唔想再order的時侯,就唔怕唔記得邊隻打邊隻!

個晚咁啱係加拿大運咗d海膽,立刻嗌一客試試!

平時大多數都係刺身又或者壽司形式食海膽,當中一定落唔少wasabi..不過佢呢度會比紫菜或青瓜配!乜都唔洗落,好食過平時好多!!!

其實已經好飽,不過金毛強極力推介當日的赤貝!叫咗一件,我地兩個share!

當我同女友掙紮叫唔叫熱盆之時..金毛強再次洞悉先機,出口問"係咪想叫pasta?"

我回應"都係..不過可唔可以portion細d!我地只係驚冇熱野落肚,好快會肚餓!!有冇素食的pasta?"

金說"有...可以試下蒜片/芫茜"

女友說"唔食芫茜!!"

金諗一諗"食唔食西班牙腸?"

女友再回應"好似唔係太有興趣"

金再諗"Parma Ham你食啦掛!?"

我倆同時回覆"食呀食呀!!"

金一路行去廚房落單的同時,轉身問我"耍Lingunie定Angel Hair?"

"唔...冇咁滯..."我個"滯"字都未講完,佢已經get到我想講乜..立即說"明白明白!!"

雖然我倆係好飽,不過真係要讚佢呢個Wild Mushroom&Parma Ham Angel Hair!!煮得好乾身,唔油!d Parma Ham係炸過, 有少少似Bacon.加上好鮮的野菌!大家都已經好飽不過都覺得好出色.最後當然冇浪費,都打包攞返屋企!

之後當然唔少得版主最愛的甜品時間...當女友考慮梗叫a定b(唔記得係乜名)的時侯,金毛強又再一次問我地"係唔係要dessert?"

女友答"唔知a好定b好..."

金回覆"兩個都唔好...叫笨蛋啦!"

"笨蛋!?"

金又係一邊行一邊走去廚房說"係燉蛋..黑芝麻焦糖燉蛋..."

燉蛋係底,上面有一浸脆脆地的焦糖係面!黑芝麻燉蛋唔會好甜,所以加上少少焦糖同埋strawberry的混合,味道相當適中!好味!!

講咗咁耐，究竟金毛強係點嘅樣？？

因未經相中人同意，所以係為另一位客人作了一些特別效果！最抵死係金生由我在低到走都一直同呢枱客人不停"交流",可能因為人地成枱女掛（講笑,其實佢都always同我地傾計）

相比起其他蠔吧，版主鐘意呢度的原因不單係佢地ｄ野新鮮好味（就算唔食蠔的選擇都好多同好食)最緊要係感覺好warm,好friendly! 所以我諗遲ｄ我又會再戰金毛強．．．